នាថ្ងៃទី២៧ ខែមីនា ឆ្នាំ២០២៦ លោកជំទាវបណ្ឌិត អ៊ុក ម៉ាលី សមាជិកាគណៈកម្មការទី២ព្រឹទ្ធសភា បានអញ្ជើញជាអធិបតីក្នុងពិធីបុណ្យឆ្លងសមិទ្ធផលនានា ក្នុងវត្តសុណ្ណគិរីប្រសិទ្ធារាមភ្នំដំរីរមៀល នៅស្រុកត្រាំកក់ ខេត្តតាកែវ។ សមិទ្ធផលទាំងអស់នេះរួមមាន៖ ដងទង់សាសនាកម្ពស់ ២៧ម៉ែត្រ រូបសំណាក់មេទ័ពស្រីជិះសេះស ឆ័ត្ររួត ហង្សស្ពាន់ទេពប្រណម្យ២អង្គ និងបង្កាន់ដៃជណ្តើរឡើងភ្នំប្រវែង ២៦២ម៉ែត្រ ដោយចំណាយថវិកាសាងសង់សរុបចំនួន២៣,០៨២ដុល្លារអាមេរិក ជាសទ្ធាជ្រះថ្លារបស់ លោកជំទាវឧត្តមសេនីយ៍ឯក អ៊ុក ដារ៉ា អនុរដ្ឋលេខាធិការក្រសួងការពារជាតិ និងឯកឧត្តម រៀម ទិត្យ ព្រមទាំងក្រុមគ្រួសារ និងអគ្គមហាឧបាសិកាពុទ្ធសាសនូបត្ថមក៍ អ៊ុក សាផន។
ក្នុងពិធីបុណ្យនេះ លោកជំទាវបណ្ឌិត អ៊ុក ម៉ាលី និងឯកឧត្តមបណ្ឌិតសភាចារ្យ ម៉ា ឈឿន អ្នកតំណាងរាស្ត្រមណ្ឌលខេត្តកំពង់ចាម ព្រមទាំងលោកជំទាវ ឯកឧត្តម លោក លោកស្រី ជាម្ចាស់ផ្តើមបុណ្យបានចូលរួមបច្ច័យកសាងសម្រាប់វត្តសុណ្ណគិរីប្រសិទ្ធារាមភ្នំដំរីរមៀល ចំនួន ២.០០០.០០០រៀល និងប្រគេនវត្តចំនួន៥ ផ្សេងទៀត ដោយក្នុងមួយវត្តៗរួមមាន៖ អង្ករ២បាវ មី២កេស ត្រីខ២យួរ ភេសជ្ជៈ២កេស ទេយ្យទាន១កន្ត្រក និងបច្ច័យកសាងចំនួន ២០០ដុល្លារ និង១.៩០០.០០០រៀល ព្រមទាំងរាប់បាតព្រះសង្ឃ ៣៣អង្គ ជាកិច្ចបញ្ចប់ពិធីបុណ្យ៕
ប្រភព៖ ការិយាល័យជំនួយការគណៈកម្មការទី២ព្រឹទ្ធសភា
